HP ભારતીય પર્સનલ કમ્પ્યુટર માર્કેટમાં સૌથી વધુ હિસ્સો ધરાવે છે: રિપોર્ટ

પ્રિન્ટિંગ અને પર્સનલ કોમ્પ્યુટર માટે જાણીતી કંપની HP એ ભારતીય પર્સનલ કોમ્પ્યુટર માર્કેટમાં પોતાનું વર્ચસ્વ જાળવી રાખ્યું છે. HPનો માર્કેટ શેર 28.8 ટકા છે. ઈન્ટરનેશનલ ડેટા કોર્પોરેશન દ્વારા જાહેર કરવામાં આવેલા રિપોર્ટમાં આ વાત સામે આવી છે.

ડેલ 24.1 ટકા શેર સાથે બીજા ક્રમે છે. પાછલા ત્રિમાસિક ગાળાની તુલનામાં, આ કંપનીએ 27.6 ટકાની વૃદ્ધિ નોંધાવી છે.

IDC મુજબ, HP એ 2016 ના બીજા ક્વાર્ટરની સરખામણીમાં 18.9 ટકા વૃદ્ધિ હાંસલ કરી છે.

એચપી ઈન્ડિયાના વરિષ્ઠ નિર્દેશક કેતન પટેલે જણાવ્યું હતું કે, “અમારા ગ્રાહકોને શ્રેષ્ઠ ઉત્પાદનો પ્રદાન કરવાની અમારી પ્રતિબદ્ધતાને કારણે અમે અમારી શેર વૃદ્ધિ હાંસલ કરવામાં સફળ થયા છીએ.”

લેનોવો આ ક્વાર્ટરમાં 17.5 ટકા માર્કેટ શેર સાથે ત્રીજા ક્રમે છે. રિપોર્ટમાં જણાવવામાં આવ્યું છે કે કંપનીએ 2016ના બીજા ક્વાર્ટરની સરખામણીમાં 27.3 ટકાની વૃદ્ધિ નોંધાવી છે.

2016ના ત્રીજા ક્વાર્ટરમાં કંપનીઓ દ્વારા લગભગ 25 લાખ પર્સનલ કોમ્પ્યુટર બજારમાં ઉપલબ્ધ કરાવવામાં આવ્યા હતા. જે અગાઉના ત્રિમાસિક ગાળાની સરખામણીએ 17.3 ટકા વધુ છે. જોકે, ગયા વર્ષના સમાન ક્વાર્ટર કરતાં 22.5 ટકા ઓછો છે.

કન્ઝ્યુમર પીસી માર્કેટમાં 13 લાખ 70 હજાર યુનિટ્સનું વેચાણ થયું હતું, જે અગાઉના ક્વાર્ટર કરતાં 31 ટકા વધુ છે.